அத்தியாயம் 2: அடிப்படை உரிமைகள்

ஒவ்வொருவரும் சிந்தனை, மனச்சாட்சி மற்றும் மதச் சுதந்திரத்திற்கு உரித்துடையவராவர்; இதில் ஒருவர் தனது விருப்பத்திற்கேற்ப ஒரு மதத்தையோ அல்லது நம்பிக்கையையோ கொண்டிருப்பதற்கும் அல்லது தழுவிக்கொள்வதற்குமான சுதந்திரமும் அடங்கும்.

எந்த ஒருவரும் சித்திரவதைகளுக்கு ஆளாவதற்கோ அல்லது கொடூரமான, மனிதாபிமானமற்ற அல்லது இழிவாக நடத்தப்படுவதற்கோ அல்லது தண்டனைக்கு உட்படுத்தப்படுவதற்கோ இடமளிக்கக் கூடாது.

1. சட்டத்தின் முன் ஆட்கள் அனைவரும் சமமானவர்களாவர் என்பதோடு, அவர்கள் சட்டத்தின் சமமான பாதுகாப்பிற்கு உரித்துடையவர்களுமாவர்.

2. எந்தவொரு பிரஜையும் இனம், மதம், மொழி, சாதி, பால், அரசியல் கொள்கை, பிறப்பிடம் ஆகிய காரணங்களினாலோ அல்லது அவற்றில் ஏதேனும் ஒன்றினாலோ பாரபட்சம் காட்டப்படுதல் ஆகாது:
   
   ஆயினும், அரச, நீதித்துறை அல்லது உள்ளூராட்சி சேவையில் அல்லது ஏதேனும் அரச கூட்டுத்தாபனத்தின் சேவையில் ஏதேனும் தொழிலுக்கு அல்லது பதவிக்கு தகைமையாக, அத்தகைய தொழிலின் அல்லது பதவியின் கடமைகளை நிறைவேற்றுவதற்கு எவரேனும் ஆளொருவர் நியாயமான காலப்பகுதிக்குள் ஏதேனும் மொழியில் போதிய அறிவைப் பெற்றிருத்தல் நியாயமான முறையில் அவசியமாகுமிடத்து, அவர் அதனைப் பெற்றிருத்தல் வேண்டும் எனக் கோருவது சட்டபூர்வமானதாகும்:

   மேலும், அத்தகைய தொழில் அல்லது பதவியின் எதேனும் ஒரு பணியை, அக்குறிப்பிட்ட மொழியறிவின்றி நிறைவேற்ற முடியாதவிடத்து, அத்தொழிலுக்கு அல்லது பதவிக்கு தகைமையாக அவர் அம்மொழியில் போதிய அறிவைக் கொண்டிருத்தல் வேண்டும் எனக் கோருவது சட்டபூர்வமானதாகும்.

3. இனம், மதம், மொழி, சாதி, பால் ஆகிய காரணங்களினாலோ அல்லது அவற்றில் ஏதேனும் ஒன்றினாலோ கடைகள், பொது உணவகங்கள், ஹோட்டல்கள், பொது களிப்பிடங்கள் மற்றும் தனது சொந்த மதத்தைச் சார்ந்த பொது வழிபாட்டுத் தலங்கள் ஆகியவற்றிற்குச் செல்வது தொடர்பில் எந்தவொரு ஆளும் எவ்வித இயலாமைக்கோ, கடப்பாட்டிற்கோ, கட்டுப்பாட்டிற்கோ அல்லது நிபந்தனைக்கோ உட்படுத்தப்படுதல் ஆகாது.

4. பெண்கள், சிறுவர்கள் அல்லது அங்கவீனமுற்றவர்களின் முன்னேற்றத்திற்காகச் சட்டம், துணைச் சட்டம் அல்லது நிறைவேற்றுத்துறையின் நடவடிக்கை மூலமாக விசேட ஏற்பாடுகளைச் செய்வதை இவ்வுறுப்புரையில் உள்ள எதுவும் தடுத்து நிறுத்தக் கூடாது.

1. சட்டத்தால் தாபிக்கப்பட்ட நடவடிக்கை முறைக்கிணங்கவன்றி, எந்த ஆளும் கைது செய்யப்படுதல் ஆகாது. கைது செய்யப்படும் எவரும் அவர் கைது செய்யப்படுவதற்கான காரணம் அறிவிக்கப்படுதல் வேண்டும்.

2. காவலில் வைக்கப்பட்டுள்ள, தடுத்து வைக்கப்பட்டுள்ள அல்லது வேறு விதத்தில் தனிப்பட்ட சுதந்திரம் இழக்கப்பட்டுள்ள ஒவ்வொரு ஆளும், சட்டத்தால் தாபிக்கப்பட்ட நடவடிக்கை முறைக்கிணங்க, மிக அண்மையிலுள்ள தகுதியுள்ள நீதிமன்றத்தின் நீதிபதி முன்னிலையில் ஆஜர் செய்யப்படுதல் வேண்டும் என்பதுடன், சட்டத்தால் தாபிக்கப்பட்ட நடவடிக்கை முறைக்கிணங்க அத்தகைய நீதிபதியினால் ஆக்கப்படும் கட்டளையின் மீதும் அதன் நிபந்தனைகளுக்கு அமைவாகவும் அன்றி, அதற்குமேல் காவலில் வைக்கப்படுதலோ, தடுத்து வைக்கப்படுதலோ அல்லது தனிப்பட்ட சுதந்திரம் இழக்கப்படுதலோ ஆகாது.

3. குற்றமொன்று சாட்டப்பட்டுள்ள எவரும் தகுதியுள்ள நீதிமன்றமொன்றால் நியாயமான விசாரணைக்கு உட்படுத்தப்படும்போது நேரிலோ அல்லது சட்டத்தரணி மூலமாகவோ தன் தரப்பு நியாயங்களை எடுத்துரைப்பதற்கு உரித்துடையவராவார்.

4. சட்டத்தால் தாபிக்கப்பட்ட நடவடிக்கை முறைக்கிணங்க, தகுதியுள்ள நீதிமன்றம் ஒன்றின் கட்டளையின் மூலமாகவன்றி, எந்த ஆளும் மரண தண்டனைக்கோ அல்லது சிறைத்தண்டனைக்கோ உட்படுத்தப்படுதல் ஆகாது. விசாரணை அல்லது வழக்கு நடவடிக்கையின் நிலுவையில் ஒருவரை கைது செய்தல், காவலில் வைத்தல், தடுத்து வைத்தல் அல்லது தனிப்பட்ட சுதந்திரத்தை வேறு விதத்தில் இழக்கச் செய்தல் என்பது தண்டனையாகக் கருதப்படலாகாது.

5. ஒவ்வொரு ஆளும் அவர் குற்றவாளி என நிரூபிக்கப்படும் வரை நிரபராதி எனக்கருதப்படுதல் வேண்டும்: ஆயினும், குறிப்பிட்ட சில சங்கதிகளை நிரூபிக்கும் பொறுப்புச் சுமையை, சட்டத்தின் மூலமாக, ஒரு எதிரியின் மீது சுமத்தப்படுவதற்கு இடமளிக்கலாம்.

6. எச்செயல் அல்லது செய்துக்கை புரியப்பட்ட நேரத்தில் அச்செயல் அல்லது செய்துக்கையானது ஒரு குற்றமாக அமைந்திருக்கவில்லையோ, அச்செயல் அல்லது செய்துக்கையின் காரணமாக எவரும் ஒரு குற்றத்திற்குப் பொறுப்பாளியாதல் ஆகாதென்பதுடன், ஏதேனும் ஒரு குற்றம் புரியப்பட்ட நேரத்தில் அக்குற்றத்திற்குப் விதிக்கப்பட்டிருந்த தண்டனையை விடக் கடுமையான தண்டனை எதுவும் விதிக்கப்படுதலும் ஆகாது.

   எச்செயல் அல்லது செய்துக்கை புரியப்பட்ட நேரத்தில், நாடுகள் சமூகத்தினால் அங்கீகரிக்கப்பட்ட சட்டத்தின் பொதுக் கோட்பாடுகளுக்கிணங்க அச்செயல் அல்லது செய்துக்கையானது குற்றவியல் சார்ந்ததாக இருந்ததோ, அச்செயல் அல்லது செய்துக்கையின் நிமித்தம் எவரேனும் ஆளொருவர் விசாரணைக்கு உட்படுத்தப்படுவதையோ அல்லது தண்டிக்கப்படுவதையோ இவ்வுறுப்புரையில் உள்ள எதுவும் பங்கப்படுத்தலாகாது.

   குற்றம் ஒன்று புரியப்பட்ட நேரத்தில் அக்குற்றத்திற்கு விதிக்கப்பட்டிருந்த அதி கூடிய தண்டனைக்கு மிகாதவாறு, அக்குற்றத்திற்கு இழிவுத் தண்டனை ஒன்று விதிக்கப்படுதலைக் கோருவது இவ்வுறுப்புரைக்கு முரணானதாகக் கொள்ளப்படலாகாது.

7. குடிவரவு, குடியகல்வுச் சட்டத்தின் அல்லது 1967 ஆம் ஆண்டின் 14 ஆம் இலக்க இந்திய - இலங்கை உடன்படிக்கை (செயலாக்கல்) சட்டத்தின் ஏற்பாடுகளின் கீழ் அல்லது அதற்குப் பதிலீடாக இயற்றப்படக்கூடிய வேறேதேனும் சட்டத்தின் கீழ் ஆக்கப்பட்ட ஒரு அகற்றுதல் கட்டளை அல்லது நாடுகடத்தல் கட்டளை காரணமாக, ஒருவரை கைது செய்தல், காவலில் வைத்தல், தடுத்து வைத்தல் அல்லது தனிப்பட்ட சுதந்திரத்தை வேறு விதத்தில் இழக்கச் செய்தல் என்பது இவ்வுறுப்புரைக்கு முரணானதாகக் கொள்ளப்படலாகாது.

1. ஒவ்வொரு பிரஜையும், சட்டத்தால் ஏற்பாடு செய்யப்பட்டுள்ளவாறு, பிரஜை ஒருவரின் உரிமையை பிரயோகிப்பதற்கு அல்லது பாதுகாப்பதற்குத் தேவைப்படுவதாகிய, பின்வருவனவற்றின் உடைமையில் உள்ளதான எத்தகவலையும் பெற்றுக்கொள்வதற்கான உரிமையைக் கொண்டிருத்தல் வேண்டும்:-

(அ) அரசு, ஓர் அமைச்சு அல்லது ஏதேனும் அரசாங்கத் திணைக்களம் அல்லது சட்டத்தினால் அல்லது சட்டத்தின் கீழ் தாபிக்கப்பட்ட அல்லது உருவாக்கப்பட்ட ஏதேனும் நியதிச்சட்ட சபை;

(ஆ) ஒரு மாகாணத்தின் அமைச்சரவைச் சபையைச் சேர்ந்த ஓர் அமைச்சரின் ஏதேனும் அமைச்சு அல்லது மாகாண சபை நியதிச்சட்டத்தினால் தாபிக்கப்பட்ட அல்லது உருவாக்கப்பட்ட ஏதேனும் திணைக்களம் அல்லது ஏதேனும் நியதிச்சட்ட சபை;

(இ) ஏதேனும் உள்ளூராட்சி அதிகாரசபை; மற்றும்

(ஈ) இப்பந்தியின் (அ), (ஆ) அல்லது (இ) ஆகிய உப பந்திகளில் குறிப்பிடப்பட்ட ஏதேனும் நிறுவனம் தொடர்பான அத்தகைய தகவலைத் தன்வசம் வைத்துள்ள வேறேதேனும் ஆள்.

2. தேசிய பாதுகாப்பு, ஆட்புல ஒருமைப்பாடு அல்லது பொது மக்கள் பாதுகாப்பு ஆகியவற்றின் நலன்கள் கருதி, ஒழுங்கீனத்தை அல்லது குற்றத்தைத் தடுப்பதற்காக, சுகாதாரம் அல்லது ஒழுக்கத்தைப் பாதுகாப்பதற்காக மற்றும் ஏனையோரின் நற்பெயரை அல்லது உரிமைகளைப் பாதுகாப்பதற்காக, தனி உரிமை, நீதிமன்ற அவமதிப்பைத் தடுத்தல், பாராளுமன்ற சிறப்புரிமையைப் பாதுகாத்தல், நம்பிக்கையின் பேரில் பரிமாறப்பட்ட தகவல் வெளிப்படுத்தப்படுவதைத் தடுத்தல் அல்லது நீதித்துறையின் அதிகாரத்தையும் பக்கச்சார்பின்மையையும் பேணுதல் ஆகியவற்றிற்காக, ஒரு ஜனநாயகச் சமூகத்தில் அவசியமானவையென சட்டத்தின் மூலம் விதிக்கப்படக்கூடிய கட்டுப்பாடுகள் தவிர்ந்த, வேறு எந்தக் கட்டுப்பாடுகளும் இவ்வுறுப்புரையினால் வெளிப்படுத்தப்பட்டதும் அங்கீகரிக்கப்பட்டதுமான உரிமையின் மீது விதிக்கப்படுதல் ஆகாது.

3. இவ்வுறுப்புரையில், "பிரஜை" என்பது, ஒரு அமைப்பின் அங்கத்தவர்களுள் நான்கில் மூன்று பங்கினருக்குக் குறையாதவர்கள் பிரஜைகளாக இருக்கும்விடத்து, அவ்வமைப்பு கூட்டிணைக்கப்பட்டதா அல்லது கூட்டிணைக்கப்படாததா என்பதைப் பொருட்படுத்தாது, அத்தகைய அமைப்பொன்றையும் உள்ளடக்கும்.